طريقة عمل الكيكة الاسفنجية العادية بالبرتقال ❤️ طريقة عمل كيك الاسبونج الايطالية

3 0 السبت، 1 فبراير 2020 تعديل المقاله

طريقة عمل الكيكة الاسفنجية العادية بالبرتقال ❤️ طريقة عمل كيك الاسبونج الايطالية الطريقه الصح لعمل كيك الاسبونج الايطالي بالتفصيل...

طريقة عمل الكيكة الاسفنجية العادية بالبرتقال ❤️ طريقة عمل كيك الاسبونج الايطالية

الطريقه الصح لعمل كيك الاسبونج الايطالي بالتفصيل الممل وياريت تفتكروني بدعوه حلوه من قلبكم💝

المعلومات والملاحظات 👇🏻👇🏻
1- في البدايه الكيكه الاسفنجيه مش بيدخل فى مقاديرها لا زيت ولا زبده ولا لبن ولا عصير، انا استغربت لما لقيت ناس بتضيف لبن او عصير
الكيكه الاسفنجيه مختلفه عن الكيك العادي

2- جميع المقادير المستخدمه بيض او دقيق لازم لازم تكون بدرجة حرارة الغرفه
يعنى انا دايما بحفظ الدقيق فى التلاجه ولكن قبل ما اعمل الكيكه الاسفنجيه بنص ساعه بخرج البيض والدقيق وخلي بالك من المعلومه دي لانها مهمه جدا هتلاقي قطرات مايه تتجمعت على البيض بعد نص ساعه كده تقدرى تستخدمى البيض

3- لو عاوزه الكيك بنكهه البرتقال ضيفي برش برتقاله على البيض بدل الفانيليا *مش عصير البرتقال* ولو عاوزه بطعم الفراوله ضيفى روح الفراوله ولكن روح الفواكه بتتضاف بعد اضافه الدقيق لكن برش البرتقال بيكون مع البيض كبديل للفانيليا

4- الدقيق والنشا والبيكنج باودر اللى هكتبلكم مقاديرهم تحطوهم مع بعض وضرورى جدا جدا تنخلوا الخليط مرتين يعنى حطي البيكنج باودر والنشا على الدقيق وانخليهم سوا ومهم اوي مرتين

5- مهم اوى ان المقادير تكفي صينيه لان لو الخليط اكبر من نص الصينيه يبقى الكيكه هترتفع وتهبط من النص وهتبقى معجنه

6- مهم اوى الفرن يتسخن اثناء تحضيرك للكيك ودرجه الحراره لازم تكون متوسطه لانها لو عاليه او منخفضه هتبقى مشكله والكيكه تبوظ اهم حاجه اظبطي الفرن على درجه 180 واقفلي الفرن لحد ما تخلصي الخليط

واخيراً اللي بيخلى الكيكه مكتومه حاجتين مالهومش تالت الاولى انك مضربتيش البيض المده المحدده له وهى ربع ساعه يكون المضرب شغال بدون انقطاع على اعلى سرعه والتانيه انك مضفتيش الدقيق معلقه معلقه ممكن تكونى ضفتيه مره واحده او كميه كبيره كل مره وده بيخلى الكيكه طالعه زي العيش ومكتومه

المقادير المظبوطه
طبعا احنا طلعنا البيض والطحين قبل العمل بنص ساعه واول ما نبدا نشتغل نسخن الفرن ونجيب الصينيه ندهنها سمنه وبعدين نحط فيها دقيق اكيد انتوا فاهمين العمليه دي

المقادير ودي انا معرفش حتناسبك ولا لا بس عموما وانتى بتصبى الخليط فى الصينيه بتاعتك وطبعاً انا معرفش مقاسها يبقى عموما اي خليط لازم يوصل لمنتصف الصينيه لو لقيتى لسه عندك خليط ممكن تحطيه فى صينيه تانيه اهم حاجه للكيك الاسفنجي ان الخليط ميزدش عن نص الصينيه لانه هيرتفع

المقادير 👇🏻👇🏻
الكوب المستخدم للدقيق لازم يكون هو هو اللي هتقيسي بيه السكر والنشا
6 بيضات بدرجه حرارة الغرفه
كوب دقيق
كوب الا ربع سكر ناعم
ربع كوب نشا
ملعقه كبيره ممسوحه بيكنج باودر
ملعقه كبيره ممسوحه فانيليا

الطريقه 👇🏻👇🏻
سخني الفرن وبعدين حطي البيض وعليه الفانيليا او بشر البرتقال وعلى اعلى سرعه اضربى البيض والفانيليا لمدة دقيقتين وبعدين متفصليش الكهربا عن المضرب وهو شغال بعد الدقيقتين ضيفى السكر مره واحده واحسبى حوالى ربع ساعه على اعلى سرعه فى البدايه هتلاقي المزيج عباره عن رغاوي لكن بعد كده هتلاقي المزيج بقى كريمه وحجمها بقى ٣ اضعاف حجم البيض في الاول لازم يبقى الحجم تضاعف لاننا عاوزين الهوا اللى خلى البيض ينتفخ اول ما تلاقي الخليط تضاعف بعد الربع ساعه شيلى المضرب خالص ومتستخدميهوش تاني فيه ناس بتحط الدقيق وتشغل على اقل سرعه وده غلط جدا جدا الطريقه دى هتخلي الهوا اللى نفخ البيض يخرج تانى ومش هتبقى هشه ابدا
باستخدام معلقه خشب ضيفي معلقة دقيق واحده وقلبي ببطء جدا جدا جدا جدا جدا فى اتجاه واحد اوعي تغيري الاتجاه او تقلبيها من تحت لفوق وافضلى ضيفى ملعقه دقيق وقلبى مرتين وضيفى المعلقه التانيه وبرضه قلبي تقلبتين بشويش وبراحه جدا لازم يفضل الخليط مرتفع لحد ما تخلص ممكن هنا تضيفى روح الفاكهه لو عوزاها بالفراوله او الاناناس بعد ما تخلصي صبي الخليط بشويش وبمنتى البطء فى الصينيه ودخليها الفرن
واياكي تفتحى عليها قبل 40 دقيقه بعد اربعين دقيقه اختبريها بعود خشب لو استوت طفي النار عليها واوعي تخرجيها من الفرن خليها جواه لانها لو خرجت وهى سخنه هتتعرض لهوا بارد وهتبوظ سبيها فى الفرن بعد ما تقفلي الحراره نص ساعه تقريبا وبعدين خرجيها
ان شاء الله لو طبقتي كل معلومه وطريقه انا كاتبها هتلاقي احلى كيكه اسفنجيه عملتيها في حياتك
وتاني يوم تقسميها ٣ طبقات بنفس الطريقه اللي في الصوره وتحشيها بين كل طبقه كريمه او صوص فراوله وزينيها بالطريقه اللي تعجبك ولو مستعجله وعوزاها فى نفس اليوم ممكن تحطيها في التلاجه 3 ساعات مثلا بس اوعي تحطيها فى التلاجه بعد ما تطلع من الفرن.